恒指散場報收21,013點，升424點或2%；國企指數升235點，跟恒指同步升2%，報收11,988點。可惜現貨場成交額不足500億元，除咗反映缸邊友唔多願在此水平入場，明日假期後，又到周六中秋佳節，唔少缸邊友提早放假外遊，魚缸當然拍烏蠅。

至於昨日結算的期貨場，成交唔算特別活躍，十月份未平倉合約亦只有七萬多份，魚缸窄幅上落又欠方向，連期貨鑊鏟友都唔願入場。十月期指在現貨場收檔後，低水近百點，古勝唔排除結算過後，好友又放軟手腳。

魚缸新丁繼續不濟

大笨象（00005）昨升2.6%，為升市火車頭，同屬重量級的祖國移動（00941），僅錄得不足1%升幅，其受寵程度自祖國開放3G後失去市場絕對壟斷地位，已大大下降。超人再度增持超人旗艦（00001），刺激其股價升2.8%，但升幅仍遜於斑點狗（00101）及三兄弟檔口（00016），兩股齊齊升逾3%。花旗企業購併活動再次活躍，孖屐憧憬以花旗為主要市場的利豐（00494）亦步入復甦期，股價急升逾6%，創31.5元52周新高，並高收於31.25元。

雖然阿爺基金停手增持紅色錢莊，但「高佬盛」唱好，工行（01398）升3.3%，中行（03988）及建行（00939）分別升2.2%及1.4%。比亞迪（01211）自得花旗股神巴菲特垂青後，主席王傳福躍升為祖國首富，刺激比亞迪股價再升5%，主席水漲船高。近日登陸本地魚缸的新丁唔多掂檔，中冶（01618）登場即告潛水，昨日登場的匹克體育（01968）有樣學樣，報收3.4元，較招股價4.1元跌17%，新丁表現一蟹不如一蟹。

創維數碼（00751）日前表示，受金融海嘯衝擊後，其他「唔入流」品牌的電視生產商開始被市場淘汰，令創維及其他主要祖國品牌銷量不跌反升，創維此等強勢品牌更具優勢。

「家電下鄉」帶旺銷量

鑑於中國彩電事業部總銷量於八月及四至八月間，均同比上升42%，成績出奇地好，創維隨即將銷售目標提升，在下相信「家電下鄉」的政策有最大功勞。

由於LCD電視市場發展一日千里，傳統CRT電視或於一年後停產，創維有意將該生產線改為LCD生產線，令其總產能增至1,000萬台。而LCD電視毛利率較CRT電視為高，一旦LCD電視亦被列入「家電下鄉」的補貼範圍，創維真係肥過肥仔水。昨日創維走勢現突破，升至3.68元52周高位，報收3.6元，升5.2%，成交額尚算配合升勢，值得留意。

古勝