本文重點
向來主力投資商舖嘅大鴻輝興業主席梁紹鴻，尋日同Vincent講，依家舖位做價升得好急，已經唔容易轉手，慢慢變成一件「收藏品」，所以諗計令業務多元化。佢話依家適逢是拓展酒店業務嘅最佳時機，尋日就同六星級洲際酒店集團簽署管理合約，在灣仔開設本港首間英迪格品牌酒店。梁氏話，間酒店連地價投資額達8億元，提供150個房間，估計在二○一二年落成，回報率料有6厘；睇嚟仲好過買舖收租。
蚊型樓鬧盤荒 交投縮
近排樓價急升，令樓價50萬元以下「蚊型樓」交投萎縮，上月登記量更失守100宗關口。利嘉閣周滿傑講，八月全港僅錄97宗蚊型樓成交，總值約3,258萬元，量值連跌兩個月。佢又話，蚊型樓交投雖跌，但樓價跟隨大市上升，好似九龍城道66號B一個C單位，原業主今年二月以28.5萬元買入，半年後帳面賺10.5萬元離場，賺幅高達37%，跑贏一般中小型住宅。
（Vincent Lau）