本文重點
內地產險市場「一哥」近排業績麻麻，雖然一年做成千億人仔生意，但竟然都唔夠賠。「一哥」曾經講過，原因係全國分支機構前線銷售人員嘅質素難以控制，所以出現咗違法、造假等行為。
聽講內地產險業今年全行業虧損幾百億，原因都係前線人員亂咁嚟。大家接觸得多呢啲違規經紀，慢慢就演變為對整個保險業嘅不信任，最弊就係大學畢業生無人想入行，令行業陷入惡性循環。
氹客落疊 造假離譜
圈中人話，有個啱啱喺監房放出來嘅人，重新投入社會後做咗保險經紀，後來又因詐騙案再次坐監，呢件事令到保險業嘅社會形象跌到谷底。佢哋戲稱依家愈來愈唔識做保險，因為個個都用誤導嘅方式去氹客仔落疊，咁搞法，入呢行嘅人就要準備隨時「先入醫院，後入法院」。
行內一位老行尊又爆料話，某間大寶號嘅省級分公司，一年之中造假嘅費用居然佔咗全年業務管理費近九成，再隨機調查呢間機構發放現金嘅資料，竟然八成人頭係假嘅，真令人嘖嘖稱奇！
余絲韻