本文重點
雷曼倒閉過咗一周年，好多秘密浮咗出嚟，劇情拍得住電影橋段。英倫銀行行長金默文爆料話去年有兩家英國銀行，如果喺幾個鐘頭內搞唔掂資金周轉難題，就會有倒閉之虞。
邊兩間銀行咁危急？英國BBC就引述金默文話，係HBOS及Lloyds TSB Group，依家聽番，可以想像當時就好似電視劇《24》一樣咁緊張。早排股神巴菲特都爆咗單料，就係因為冇聽留言，未能及時打救雷曼嘅烏龍事。
國家特使把風防災
秘密又點止係英國至有，《彭博》尋日就話，中國去年喺雷曼倒閉後兩日派咗特使去美國，同一班哈佛大學學者商討中國應該點樣應對。呢位特使就係劉鶴，佢既係學者，亦係中國官方倚重嘅經濟顧問，今年三月甚至與美國財長蓋特納、白宮經濟顧問薩默斯等勁人見面，佢嘅報告當然會畀領導層睇。
報道話劉鶴係哈佛大學甘迺迪政治學院畢業生，係複雜型思想家，擁有良好分析能力。劉鶴個人唔鍾意見報，熟悉佢嘅人都話佢異常低調，自○三年來嘅職位都係中國中央財經領導小組辦公室副主任，組長係總理溫家寶，組員包括副總理王岐山及人行行長周小川等。
余絲韻