胡文新係鑽石黃老五，間唔中會喺社交名人版見到佢嘅蹤影。佢九九年喺史丹福大學MBA畢業後就加入合和，當時合和適逢喺九七金融風暴時投資泰國高架鐵路以及印尼電廠，搞到有成80億美元嘅重大虧損，佢同老竇胡應湘一齊並肩作戰。到咗10年後嘅今日，金融危機捲土重來，佢哋都可以穩如泰山，都可以稱得上係「父子同心，其利斷金」。

調任MD年酬金300萬

合和啲老友話，胡應湘好錫呢個仔，一直都想交棒畀佢，○二年時就送咗1,200萬股合和股份鼓勵佢繼續努力，所以佢今次「坐正」都係眾望所歸及理所當然。合和仲公布埋胡文新現時分別持有合和及合和基建（00737）分別3.01%及0.46%嘅股權，調任後佢喺呢兩間公司每年所收嘅酬金分別係300萬及200萬元。

至於與胡應湘一齊喺六九年創辦合和，今年都有成76歲已到咗退休年齡嘅何炳章，雖然今次唔再擔任公司董事總經理一職，但就仍然係副主席及薪酬委員會主席。另外，合和嘅非執董梁國基則調任為執行董事。

余絲韻