本文重點
長者推行使用平安鐘都有好幾年，但可能喺不久將來，個個華爾街嘅銀行家都要佗住個平安鐘喺身，唔係驚有乜頭暈身㷫要㩒鐘，而係怕畀班客威脅到人身安全！點解咁講呢？因為英國滙豐已安排所有會接觸到客人嘅員工，無論係企喺門口嗰個或要同客開會嗰位，都要有個平安鐘護身。
防客人過激保平安
其實呢班員工要孭住個平安鐘，都係身不由己，鬼咩！金融海嘯之後，好多私人街客或者公司企業，財務上都可能出咗少少問題，要同銀行職員開會，有啲客畀銀行追數，或者被拒絕借貸申請，所以佢哋同銀行家見面時，有時都會激動少少，甚至扯晒火都有！佗個平安鐘，有起事上嚟都可以即刻㩒鐘搵救兵。
不過亦有批評話，整個咁樣嘅鐘仔，銀行同客人之間就無晒信任可言，而且如果佗住個鐘仔同熟客開會，某程度上都幾傷大家感情。好彩個鐘仔就唔係掛喺心口咁顯眼，而係細細地掛喺條皮帶上，如果唔係畀客人見到都幾憂心。
余絲韻