本文重點
香港投資基金公會一年一度嘅論壇又嚟喇，適逢金融海嘯一周年，會唔會影響入座率呢？行政總裁黃王慈明話初時都有啲擔心，不過後來反應出奇咁好，依家仲諗緊點加位。除咗因為啲會員都想知多啲「海嘯」後嘅基金界發展，其實啲嘉賓都好吸引㗎，銀公主席王冬勝嘅演講題目係近日好熱門嘅「國際金融中心——香港或上海？」，聽講呢個題目係佢親自揀，相信必定有一番見解。
倡積金自願供款免稅
香港投資基金公會啱啱轉莊，新任主席係景順投資嘅首席營運總監吳家耀（Desmond），副主席就係摩根資產香港銷售及市場業務總監潘新江。Desmond就話嚟緊一年想做多啲投資者教育，等投資者了解強積金體系，佢慨嘆話，調查顯示八成人都知單靠強積金退休根本唔夠，但又唔知點投資好，所以都建議政府為自願供款設免稅額，鼓勵投資者「加碼」。
其實近半年投資氣氛好番好多，上半年基金市場淨流出咗七百萬美元，而七月份已回復正數，其中以大中華及亞洲區基金最受歡迎。Desmond話如果退休基金可以買Ａ股係好嘅選擇，中國係世界增長火車頭，啱晒退休基金嘅長期投資需求。
余絲韻