教學生哥居安思危

佢又同學生哥講，話做領袖最緊要居安思危，如果有人同你講「冇事㗎」，信一半好喇，不過任總補飛話自己都會錯，但希望犯錯少過其他人。佢仲自嘲咁話，喺港股萬八點嘅時候，佢猛叫人小心風險，點知個市狂升，呢回真係信咗就死。

講到居安思危，佢話自己無論喺屋企定係公司，成日都會思考，好似捉棋咁諗吓下一步會發生乜嘢事，而又可用乜嘢方法應付，佢間房有兩個夾萬，其中一個就放咗好多備用方案。

作為一個金融監管者，佢語重心長話時時刻刻都要顧住大眾利益，不過依家金融同經濟好似有小小脫軌，一旦金融自己本身有咗生命，而唔係去支持經濟，就會有好多問題。退休後會唔會再咁敢言？任總話如果係關乎香港嘅大事大非，佢會出嚟講，如果有人已經處理緊，佢就唔應該指指點點。

余絲韻