本文重點
「打虎英雄」最後一刻繼續有得玩！任期原本在今日屆滿嘅證監會法規執行部執行董事施衛民（Mark Steward），最終喺約滿前夕獲得續約3年，即係做到二○一二年九月二十四日。隨着新任期嘅開展，睇嚟市場傳聞因調查雷曼事件而令銀行界不快嘅施衛民，可以繼續打股市嘅大老虎，而證監會行政總裁韋奕禮相信亦好開心，因為繼續有呢位得力伙記幫手，齊齊打擊金融違規事件。
Last day續約 留任證監3年
今年來證監會成績可謂勁好，先後成功檢控好幾宗內幕交易案，被定罪者不乏投行高層，例如上周因內幕交易被定罪嘅大摩前高層杜軍，又成功阻止電盈大股東私有化計劃。但喺背後執行行動嘅施衛民卻遲遲未獲續約，有消息話因為喺調查雷曼迷債案中，施衛民成功促使分銷銀行及證券行向客戶作出回購，令銀行界大感不快，而向有關方面大打小報告，迫使呢位證監會法規部「一哥」不獲當局續約。
施衛民做多3年，證監會就最高興，仲出晒稿話佢貢獻良多，熱切期待佢繼續為證監會効力，維持及促進一個公平、具透明度及有秩序嘅證券及期貨市場。既然講到咁好，真係唔明點解財爺要等到施衛民任期屆滿前一日先再度委任佢，令市場擔心可能失去呢位「打虎英雄」！
另方面，證監會營運總裁簡俊傑（Paul Kennedy）目前嘅任期亦會延長9個月，至明年七月十五日。
余絲韻