本文重點
近期樓價狂升，唔少喺早前高位入市嘅業主再進一步縮窄議價空間，好似賭王四太梁安琪或有關人士持有嘅一批大角咀浪澄灣單位，Vincent收到風，今年初市差時，批貨按買入價折讓13%至14%沽售，但四太最新沽出嘅5座一個中層A室，就直頭「無價講」，成交價同買入價相同，都係1,012.8萬元，呎價9,043元，樓盤做得番呢個價，都可謂金融海嘯後屋苑嘅新高價，而四太剩番嘅放盤單位叫價亦比買入價高8%。至於基金TPG揸住嘅同屋苑單位，議價空間亦由高位時8%，收窄至最新嘅3%以內。
中區核心商業區地價寸金尺土，靚寫字樓盤源唔多外，車位放盤就更加可遇不可求。
統一中心停車場標售
Vincent知道新龍國際（00529）剛委託代理標售金鐘統一中心7樓全層停車場，市場估值約8,800萬元，以該層共64個車位計，每個約138萬元，回報達4厘以上，媲美甲級商廈。據悉，業主在○四年初以6,380萬元買入。聽美聯商業營業董事翁鴻祥講，雖然上址位於7樓，但設有兩部車
，要泊車都相當方便，截標日期為十月十三日。