本文重點
滙豐近年成日畀人鬧唔做窮人生意，不過最近佢哋推出咗社區關愛櫃位同埋社區關愛大使，照顧長者以及一啲有特殊需要嘅群體，聽講新措施推出咗一周反應良好，繁忙時間有差唔多10個客戶輪候，平均都慳咗3至5分鐘時間。
延長服務 體貼長者
早前滙豐嘅香港區個人理財業務零售網絡主管韓克強親身到訪分行，訪問長者對新專櫃嘅意見。有客戶話社區關愛大使着嘅紅色外套好吸引，令人一睇就可以分出。
滙豐初時喺21間人流最多嘅分行入面，試行呢個長者服務專櫃嘅概念，服務時間原本係朝早9點至11點，啱啱無耐之前就推廣開去，依家所有提供一般銀行服務嘅分行都有提供呢個櫃位，而且服務時間更延長到全日，人流最多嘅20間分行仲會安排社區關愛大使幫手。
老人家嘅視力唔係咁好，有時都會老眼昏花，為免佢哋睇唔清楚，分行仲有放大鏡提供，認真細心。
余絲韻