資深「賓卡」排隊退休？

Lawrence喺銀行界都算係老前輩，佢未加入中銀香港之前，喺滙豐工作超過20年，離開滙豐前主力做本地按揭生意，所以對香港嘅按揭市場相當熟悉。佢喺○六年加入中銀香港呢個大家庭，距今只係三年幾，話咁快又退休嘞。睇樣又真係唔似咁快退休，不禁令絲絲有啲唏噓，眼見近年都有唔少資深「賓卡」退下來，好似有轉型做礦業嘅柯大俠以及李永鴻、李晉頤，再早啲嘅就有陳棋昌、彭玉榮，實在係銀行界嘅損失，如果再加埋任總，絲絲真係愈諗愈失落。

信用卡副總梅月嫦接棒

Lawrence個位由邊個頂上？圈內人對佢唔會陌生，佢就係中銀信用卡副總經理梅月嫦，呢個月上旬已經生效咗。絲絲好多年前已識得梅副總，嗰時佢已經喺中銀信用卡做緊嘢，佢畀絲絲嘅印象就係一個實幹型嘅職業女性，好做得，多年嚟默默耕耘，今日終於離開中銀信用卡嘅崗位，再上一層樓，亦係實至名歸。

余絲韻