雖然上證指數3,000點仲係阻力重重，但港股有理無理升咗先算，好多人話大市成交唔配合，的確係，因為大市雖再力逼今年高位，但可借市場一啲氣氛都冇，始終唔覺係一個升市。自從六月內地傳出關水喉嘅傳聞後，啲股仔就無晒炒味，古晨就希望大市衝穿22,000點，等大家嘅信心返晒來，咁大家就有好日子過啦。
業績期仍然是近期炒作焦點，中油燃氣（00603）公布至六月底止半年業績，錄得純利7,980萬元，按年增長61.4%，表現理想，而股價亦即時作出反應。古晨記得七月底時，中油燃氣曾發過1億份認股權證，行使價係0.43元，不足兩個月後，又公布一份咁好成績表，相信短期借業績炒上嘅機會好大，大家不妨留意吓，隨時炒吓炒吓見0.7元都唔奇，止蝕就定0.48元。
古晨