昨日魚缸表現可以用四個字講晒──悶局一場，無論係大隻佬、紅色分子定係股仔，在缺乏成交支持下，未見有太大突破。早段恒指窄幅上落，下半場祖國移動（00941）公布八月份上客數字止跌回升，股價在散場前掃上80元，報收80.3元，升2.4%，已向恒指貢獻44點升幅。恒指午後升至21,704點，散場報收21,701點，升228點或1%；國企指數重上12,500點水平，報收12,511點，升0.7%或93點。

成交縮水純挾淡倉

然而，大市成交額跌至自今年三月底以來新低，只有499億元，古勝睇昨日係乘勢挾淡倉居多，唔多似係大戶有心掃貨。除咗祖國移動，大笨象（00005）升勢亦持續，報收91.75元，升0.8%，其他大隻佬普遍向上，只有少數逆市下跌，祖移競爭對手二奶電話（00762）係其中一員。

國家電網或減持手上紅色錢莊股份，建行（00939）跟工行（01398）同屬出貨對象，兩行沽壓較大，前者散場報收6.46元，逆市跌0.4%；後者午後回穩，倒升1.5%，報收6.11元。

超人於上周四度增持超人旗艦（00001），對股價帶來支持，回復紅底股身份，報收100.8元，升1.7%。至於周一已落鑊的濠賭股，缸湖傳聞廣東省放寬澳門遊，令相關股份繼續熱炒，個別股份升逾5%。

金價節節向上，金礦股愈戰愈勇，紐約期油價亦重上70美元，應該輪到石油股從後趕上。中石油（00857）昨升1.4%，報收9.38元，中海油（00883）僅升0.9%報收10.84元，股價已橫行一段時間，配合油價向上，若成交增加添上升動力，有條件創年內新高。

美元積弱「油魔」翻生

中海油業務集中在上游，所以官府控制成品油價格的機制對其影響較少，反而國際油價的變動，對其盈利有較直接影響，導致中海油股價較中石油或中石化（00386）更波動。近日「油魔」有翻生迹象，跟美元疲弱有莫大關係。日前「大魔頭」發表吹水報告，中長期睇好油價，唔單止係弱勢美元或維持一段較長時間，報告指於一○年後，多餘產能減少，○七至○八年供應緊張的狀況會重現，屆時油價高企，所以中海油值得睇高一線。

古勝