如果你信事情各有前因，咁穿情侶裝呢個行動，可以為呢對情侶甚至係身邊人發放唔少訊息。例如話你知佢哋感情勁好，好到唔介意旁人話肉麻；陰謀論一啲，逼對方穿情侶裝仲可以「證明」佢有幾愛你，向潛在情敵「宣示主權」。

再講，如果對方公開證明好愛你，無形中都提升咗你嘅市場價值。我聽過一個故事，話說「美女A」每逢遇到不合心意嘅追求者時，都會提議去酒吧飲杯嘢，美女A喺酒吧會表現得好欣賞追求者，但最後留低一句：「你真係好好，可惜我已有男朋友。」美女A離開後，追求者真係甚受酒吧內嘅女士歡迎，因其他女士難免覺得追求者係「筍盤」，固然機不可失，簡單講即係「瘦田無人耕，耕開有人爭」。

瘦田呢個現象已間接支持「順勢而行」呢種投資策略。喺經濟學上，價格係發放訊息最好嘅工具，價格變化引伸供求情況變化。炒股時，千祈唔好只識用個「挾」字解釋大市升跌。

可與股票談戀愛？

最近滙控（00005）強勢，或反映市場對環球經濟、金融業或滙控本身前景嘅睇法有變。依家滙控比今年三月時升咗成兩倍，實實在在咁答謝同公司共患難嘅股友，又係咪證明其實可同股票談戀愛呢？

（大健）