本文重點
等咗咁耐，個市終於追貼兩萬二，但好多股份嘅股價已見突破，股友欲追不成，惟有將焦點轉去今周串燒式出爐嘅新股「止吓痕」，希望賺埋最後呢個升浪。今輪新股熱潮會有幾「癲」？問吓身邊有幾多人抽都估到一二。「抽定唔抽？」「抽邊隻好？」繼續係你我關心嘅話題。
大包圍恐攤薄利潤
「國藥（01099）抑或中冶（01618）？」上周你可能諗嚟諗去，今個禮拜你或者都仲要諗，因為佢哋會喺本周上市，仲有得追。高妹都想趕上尾班車，問我邊隻好，我就求其講最多「大孖沙」捧場嗰隻，佢話市盈率（PE）太高、「冇乜肉食」；我再話隻隻抽一手，佢又覺得利潤被攤薄。「抽邊隻好」正如「咖啡定奶茶」，最後我買咗杯鴛鴦畀佢。
55%股友自信可掘金
嚟緊仲有咁多隻新股，但散戶資金有限，需花時間慢慢諗、慢慢揀。今期《東方產經》網上民意調查，睇吓股友有冇信心今輪新股賺到可觀利潤，截至上周末晚上六時，55%人話有信心，話冇信心嘅就有45%。高妹仲未揀到，我哋走去問中大酒店及旅遊管理學院會計與財務高級導師李兆波（李Sir）嘅意見，佢順道畀埋散戶抽新股嘅貼士。
（莉莉）
若有料報畀高妹同莉莉或有嘢問，可電郵money.biz@opg.com.hk