港股隨外圍續升，恒指再創年內高位，收報21,768點，升365點，成交846.5億元，尚算配合升勢。可惜詩詩的持貨逆市下跌，反而早兩日沽咗大冶有色（00661），呢兩日好似幾好，企穩0.9元樓上，或者要再吼番。
新股同半新股再度熱炒，雖然早幾日明星新股中國生命（08296）已開始派發兼回吐，但見半新股又落鑊，今日吼吼中國秦發（00866）。煤價回升，對上市後公布首份差強人意業績的秦發帶來支持，昨日股價爆升逾兩成，終於尋底成功，似要再展升浪。
秦發股價曾高見3.56元，受累中期業績倒退逾九成，股價早前被質低至1.69元。期間獲內地股壇大好友，西京投資的主席垂青，在股價低殘期間密密增持，目前持股量低於5%，但唔排除遲吓有機會增持至需要披露水平。即使「女股神」劉央未有透露共買入多少秦發，但得西京欽點，相信秦發已見底，呢個價上車，博上50日線即2.6元水平，都有兩成利潤。
詩詩