本文重點
敦沛期貨行政總裁丁世民（Simon）加入金融界已有三十個年頭，七九年時佢一畢業就加入匯業集團，接觸股票、外匯、黃金等投資工具，打好咗根柢，鍾意挑戰嘅Simon始終覺得瞬息萬變嘅期貨市場先啱佢，於是喺八七年開始轉做期貨至今。工作以外，Simon興趣多多，被朋友形容為動靜皆宜、文武全才。
卡通收藏最愛史諾比
「靜」，當然要講佢林林總總嘅珍藏。Simon收藏咗唔少八達通、卡通原稿，最鍾意嘅史諾比手繪原畫稿，依家可能三千幾美元都買唔到。佢話鍾意收藏，係因為可回憶番之前嘅生活片段，好似史諾比卡通佢就由細睇到大，非常鍾意，中五時追女仔時更加畫史諾比吐心聲呢！
「動」，就係幾乎冇乜運動可難倒Simon，當中佢最鍾意係踩單車，貪其可一路做運動，一路欣賞沿途景色。細個時佢已經開始對踩單車有興趣，中學時仲會掹住巴士尾踩添。不過，Simon話阿爸其實唔鍾意佢踩單車嘅，所以佢每次都要偷偷咁踩，同埋將部單車放喺外婆屋企。佢人生第一部單車，都係佢好辛苦儲咗一年早餐錢，仲要搵阿媽補貼先至買到。
余絲韻