本文重點
恒隆地產（00101）董事長陳啟宗喺去年底金融海嘯時，講明為咗縮減開支及共度時艱，會向執董「開刀」減人工。最新公布嘅年報顯示，陳啟宗就「身先士卒」，董事酬金減咗逾20%，只有2,750萬元；董事總經理袁偉良減幅仲勁，達22%，總酬金只有2,540萬元；另外兩名執行董事吳士元及高伯遒嘅董事酬金亦減咗逾18%，分別只有1,380萬元及1,240萬元。
不過今次董事酬金減少，並非真係減佢哋份薪金，而只係大減花紅，4名管理層今次加埋嘅花紅只有1,720萬元，比起○八年度嘅花紅總額大縮水77%。
邁向黃金十年唔使憂
其實班執董又唔使唔開心，因為陳啟宗喺年報都話，踏入二○一○年代將會係集團嘅黃金時期，明年開始集團喺內地每年最少有一個商場項目落成，為未來嘅「黃金十年」提供穩定租金收益。再者，早前恒隆地產又賣咗咁多君臨天下園景單位，嚟緊嘅收益應該唔錯，○九年度減咗嘅花紅，分分鐘喺明年度攞番晒。陳啟宗早前都話，5年內投資400億元於內地項目已接近完成，計埋匯率，依家已投資咗383億元，不過，佢喺年報話未來12個月內有機會可再增添一至兩幅地皮，絲絲惟有等佢好消息啦。
余絲韻