不過，本地魚缸連升幾日，高位點都有獲利回吐，恒指散場報收21,768點，升365點或1.7%；國企指數報收12,668點，升142點或1.1%，現貨場成交額增至846億元，唔係乾炒牛河，古勝則認為股價升咗，成交自然增加，仲有呢個月又多咗咁多新丁，成交增加好正常。

祖國移動受冷落

大笨象（00005）回歸祖國之風愈吹愈烈，暫未見管理層有回應，缸邊友更加信到十足。昨日甫開波已升穿90元，成為魚缸火車頭，盤中高見91.15元，散場報收90.95元，升4%。祖國移動（00941）相對落後，僅升0.6%，報收78.5元。祖移今時唔同往日，自從祖國3G啟動後，祖移已失去絕對優勢，加上ARPU跌勢未止，面對二奶電話（00762）跟祖國電信（00728）兩大對手，即使能保龍頭地位，但亦無以前咁好賺，芬佬掃貨當然就住就住，邊有過往唔睇價掃貨咁豪爽。

本地地主亦係魚缸主要上升動力，普遍升幅超過2.5%，超人旗艦（00001）回復紅底股身份，三兄弟檔口（00016）更升逾3%。金價愈升愈有，金礦股普遍做好，紫金（02899）跟招金（01818）齊創年半新高，前者升2.5%，報收8.36元，後者升1.2%，報收14.96元。其他資源股亦活力十足，煤炭股表現較突出，在下建議睇住水泥股，話晒華潤水泥（01313）登場，影子股又會落鑊。紅色錢莊表有老利表現，除咗中行（03988）逆市下跌，建行（00939）、工行（01398）跟交行（03328）創逾一年新高。

現價已現吸引力

在今個升浪中，基建股表現算係落後，古勝認為同基建股估值偏高有關，但當魚缸整體估值已偏高，基建股睇落又抵買番。較早前被社保基金減持的中交建（01800），股價曾跌穿9元，不過落到呢啲水平，芬佬買貨變得積極，講到底其前景仍被睇好。

大型基建股毛利率一向偏低，但配合其他收入增加，中交建截至六月底止半年純利增37.5%至30.25億元人仔，已算唔錯。基建建設業務上半年毛利率降至6.2%，主要是受高價原料存貨影響，但在高價存貨消化後，下半年毛利率將會提升，帶動全年業績表現。相對中鐵建（01186）及中國中鐵（00390），中交建市盈率最低，晒士又係最大，買股龍頭，要買祖國基建股，中交建當然係首選。

古勝