颱風影響，半日市有309億元成交已算唔錯，21,000點依然係好淡雙方對峙的重要關口，尋日借推低中移（00941），淡友先勝一仗，詩詩相信短期仲係波幅市居多，中長線睇，只要外圍無大問題，港股仲係升穿21,300點阻力，比重返20,000點樓下的機會大。
市場無消息炒，又驚內地銀根收緊，內房及內銀無運行，反而內需股有另一片天地。豬肉股雨潤（01068）業績曝光後，每日升少少走勢認真亮麗。由紡織股搖身一變進軍內地時裝零售的德永佳（00321），近期走勢對辦，由月初6.1元抽上7.28元，近日稍為整固，走勢極似旗形突破的前奏。
今年三月底止業績，德永佳盈利跌7.1%得8.6億元，紡織業在海嘯下出口減少，經已完全被增長中的零售分銷生意抵銷。街外估今年公司可賺超過9億元，市盈率10倍左右，破位在即加埋估值唔貴，一於將收day low走勢麻麻嘅大冶（00661）止蝕，實行來個跟紅頂白。
詩詩