本文重點
《福布斯》中文版尋日新鮮出爐咗個中國基金排行榜，仲第一次加咗中國十佳基金經理及私募基金嘅排行榜，絲絲日後再搵佢哋攞投資意見，就可以跟個榜嚟做。
王亞偉膺最佳「芬佬」
呢次係福布斯第6次發布中國基金排行榜，佢哋話主要想為中國投資者提供客觀嘅基礎數據研究及投資參考。今次共有60隻開放式基金及5隻封閉式基金上榜，興業趨勢投資混合（LOF）、富國天利增長債券及華夏興華封閉分別喺股票型基金、普通債券基金及封閉式基金中拔得頭籌。
至於新增嘅中國最佳私募基金排行榜以及十佳基金經理榜名單，金中及西鼎喺私募基金中位列榜首，已擔任基金經理11年嘅華夏基金王亞偉以63.02%嘅超越基準幾何年化收益率遠勝同行，而做咗基金經理近5年嘅王曉明就排名第二。
福布斯話基金要符合到佢哋好多甄選條件先可以入圍，至於選基金經理都好嚴格，就係以95位任期超過4年嘅人作為候選池，事關佢哋剛啱跨越咗兩輪牛熊轉換，最可以顯示佢哋嘅真功夫。
余絲韻