本文重點
滙豐入股交行（03328）多年，雙方一直有唔少交流，尋日舉行嘅國際銀行營運研討會，滙豐銀行執行董事王冬勝（Peter）與交行首席經濟學家連平同場演出，就中國金融問題發表意見。大家當然十分關注兩間銀行嘅合作情況，原來Peter與連平一早合作過，係兩間行最早互相交流嘅「高管」！
赴英滙豐學法結緣
連平見番王冬勝，即刻同大家一齊想當年，原來佢係第一批去滙豐英國倫敦總部學習嘅管理層，當時帶佢哋參觀總行嘅就係Peter，講完後佢望一望同台講者Peter，絲絲好似感受到佢流露出一種「他鄉遇故知」嘅感覺。既然有淵源又合作開，仲要咁有緣分同台出席研討會，傾起嘢上嚟互動性都強得多。
講番○四年滙豐入股交行至今都有五個年頭，連平話當時好多管理層走出去，學完嘢返到祖國都有好大變化。絲絲成日聽到市場話滙豐同交行合作關係如魚得水，睇嚟真係無錯，同其他外資行一邊掟內銀股票，一邊齊齊話合作愉快，真係強烈對比！
余絲韻