近期港股真係壞消息接踵而來，先有傳內地「閂水喉」，早前已經嚇到港股半死，上個禮拜反彈，以為無事又埋位炒過，點知周末又傳中美可能爆發貿易戰，不利消息一浪接一浪。尋日得半日市，下晝開市只見啲嘢走走哋樣，正所謂「高處不勝寒」，忍一時或許可以風平浪靜。
內地雖然經濟上得到高速發展，但環境上同時亦付出沉重代價，近期中央多次表明對環保嘅關注，未來環保行業將受惠國策，光大國際（00257）轉型環保多年，現時發展已十分成熟，○九年上半年營業額達到11.01億元，增幅更高達40%，溢利有1.97億元，勁升47%。光國已進入收成期，加上國策扶持，應該係有買貴無買錯，尋日市再突破3.2元阻力關口，睇怕4蚊都無走雞，止蝕不妨放在2.8元。
古晨