雖然雙方今次幾個項目，貿易總額不足30億美元，不過喺金融海嘯下，一粒石仔隨時都可翻起巨浪，因此隔晚花旗魚缸早段都受壓，本周五係花旗市場三重期結，好友苦戰三個月，將魚缸粉飾都幾靚仔，又點會咁功虧一簣呢，最終花旗魚缸亦轉跌為升，升21點收市，可以講係皆大歡喜。

貿易戰不易爆發

雖然花旗魚缸似乎未受影響，但港股在半日市效應下，昨日走勢認真麻麻，早段曾有反彈再試21,000點，可惜無功而回，末段拋售壓力增，睇來市場對貿易戰一事仍存在一定戒心。不過，古勝認為，花旗今次實行懲罰性關稅，姿態多於一切，由於花旗經濟每況愈下，奧巴馬要承受嘅壓力相當重，加上花旗汽車業困難重重，奧巴馬都係希望做少少嘢，希望平息國內民眾不滿，現時兩方已經搵咗世貿做和事老，估計最終會和氣收場，真係「爆鑊」機會不高。

話雖如此，淡友捱打咗成幾個月，近期港股又似乎真係缺水炒上去，不排除淡友會借勢向下殺番轉，後市短期睇怕仍有反覆。

港股業績開始炒至尾聲，要炒嘅一早炒起，炒唔起嘅亦會繼續炒唔起。近期港股熱錢流入速度減慢晒，缺乏新錢流入，估計唔少基金都會重整吓個投資組合，邊間公司賺到錢，邊間蝕錢，邊間要沽，邊個要問，係時間重整一下。

毛利率有所改善

冠捷（00903）上半年純利達5,500萬美元，經過海嘯衝擊後，旗下LCD顯示屏及電視，每件毛利金額由第一季的4.6美元及12.2美元，大幅改善至第二季的7.1美元及17美元，毛利率得到改善，業績自然出色。

現時日本電視機公司正出售部分生產設施及裁減生產規模，有意加快外判生產速度，而中國電子集團現持有冠捷約27%股權，日本聲寶正計劃同中國電子集團組合營，估計冠捷未來可望從中受惠。

花旗早前亦出報告睇好冠捷，將其LCD電視全年付運目標，由700萬台至800萬台，上調至800萬至900萬台，而電腦顯示器付運量方面，花旗則由年初估計下跌5%至7%，調升至與去年持平，而且維持「買入」投資評級，目標價由3.94元調高至5.18元。既然花旗都睇得咁好，不妨小注追入。

古勝