本文重點
A股氣勢如虹，內地券商亦喺香港大事擴張，中信證券喺香港嘅第7間分行尋日開張大吉，中信證券國際董事總經理楊秀臣同絲絲講，話新店用咗下載式嘅交易平台，特別迎合內地客人嘅喜好。
原來內地同胞同我哋喜好唔一樣，佢哋買賣股票鍾意下載咗個軟件用嚟做交易平台，香港人就鍾意用登入網站嘅形式交易，絲絲都覺得用網站交易方便啲，因為唔一定要喺自己電腦度先做到買賣。
下載平台照顧內地客
楊秀臣解釋話，新店要多啲照顧內地客，所以推出埋呢個系統，仲話中信證券內地市佔率高達8%，個交易系統一定信得過，依家兩個系統任客人揀，用得舒服。
絲絲同中信證券研究部首席分析師潘建平傾偈時，佢打趣話自己研究建築同材料，其實即係研究打鐵，係中國最古老嘅行業，不過絲絲睇番佢啲戰績，發覺佢喺內地研究拎過好多次行業分析師第一名，佢仲話以後研究會睇埋H股，大家又可聽多啲精闢見解。
余絲韻