本文重點
轉眼間金融海嘯發生一周年，危機係咪已過言人人殊，不過英倫銀行肯定認為「海嘯」已經過去，點解？因為佢哋喺下周末會再次開放央行大樓內嘅Court Room畀遊客參觀，呢間房除咗用作央行開董事會外，更係央行高層去年開會研究支援銀行系統嘅「戰時密室」，去年就由於高層要喺九月二十及二十一日加班開會應對金融海嘯而謝絕開放。
「海嘯」後謝絕開放
參觀Court Room活動係一年一度Open House London項目之一，去年英倫銀行只限遊客參觀央行博物館，免得阻住央行開會度橋對應金融海嘯。現時喺倫敦證券行任職經濟師嘅Colin Ellis，喺去年金融海嘯期間於英倫銀行任職，佢回憶話當時氣氛好緊張，同事都分成不同危機應對小組，同時間被要求唔好互相談話，仲話當時啲人多到要企喺度，依家危機過去，大家再有機會出去聞吓玫瑰花香。
余絲韻