尋日○九年九月九日，出現三個九字十年一遇，象徵「長長久久」，喺呢日結婚自然好意頭，如果揀呢日開張，生意亦應該唔使愁。致富證券就揀咗喺呢日開分行，唔知係咪想取個好意頭？不過，該行董事總經理周松堦話，其實揀呢日都冇乜特別意思，只係用舊曆計，農曆七月廿一日係吉日，宜開市，呢日開舖可以生意大吉。
計埋尋日新開張嘅美孚及香港仔分行，致富已經開咗十六間分行，今年仲會喺銅鑼灣及大埔多開兩間，明年七月就輪到將軍澳。周老闆話，客戶人數今年增加咗兩至三成，達到四萬三千人；經紀荷包自然大進帳，佣金收入比去年同期多咗三成，仲多過○七年旺市嗰陣。嚟緊周老闆都有排忙，因為九月廿一日會搬總行，到時又會大鑼大鼓，連亞太區老細都會出席。
余絲韻