本文重點
渣打香港慶祝150周年嘅150元紀念鈔，除咗意念夠型，心思亦相當細密，因為呢個Project只進行咗大半年，時間緊迫之餘仲一直係秘密進行，呢班員工開OT都無得同人講，認真慘情，不過出到嚟個效果咁好，足見所有嘢都係值得嘅！
搞創作比賽贈筍工
尋日返工個個員工枱頭都有份號外，詳細講番渣打歷史兼紀念鈔詳情，就連喺中環街頭都有人派呢份號外，果然係普天同慶祝賀渣打150歲生辰！呢張紀念鈔嘅出現，確係打破咗好多個不可能，起碼大家都以為150蚊嘅鈔票係唔會有嘅，聽講成個意念及鈔票設計，行政總裁洪丕正及執董兼亞洲區財務總監馮隆春都貢獻咗唔少。
員工們咁落力係咪有着數？原來唔係，紀念鈔認購要講公平、公開及具透明度，員工都要同一般市民咁排隊填表先買到紀念鈔，絕無內部認購。渣打仲喺社交網站Facebook有動作，邀請參賽者以150元紀念鈔為題，創作原創圖片或短片，勝出者有機會做實習生3個月，但當然唔係咁簡單，要過三關先會得到呢份筍工。
余絲韻