「09兩岸四地金融高峰論壇」會喺本周末舉行，主辦單位中國證券市場研究設計中心及中國金融聯合會為咗增進大家嘅友誼，決定喺論壇開始前一日，先喺深圳觀瀾湖搞番場高爾夫球邀請賽，實行「先兵後禮，打完再講」。

搞Golf賽80人參加

睇番參賽者名單有成80人咁多，包括有中證監前任主席周道炯、台灣證券櫃檯買賣中心董事長陳樹、寶來證券（香港）總經理劉國安、交行副行長葉迪奇、銀河證券首席經濟學家左小蕾、獨立經濟師謝國忠等。比賽採取18個洞個人比桿賽，除咗有總桿同淨桿前3名，仲設有最遠距離、最近洞、小鳥、老鷹等獎項，最搞笑係仲有BB獎，唔知一桿入洞獎最後會花落誰家呢？

余絲韻