本文重點
港交所（00388）行政總裁周文耀明年一月榮休，依家各方人士已經密鑼緊鼓，諗緊點同佢餞行，其中五大證券經紀組織包括證券商協會、證券學會、證券及期貨業職工會、網上經紀協會、專業財經分析及評論家協會，已經諗住聯合為周文耀搞告別。證券商協會嘅蔡陳葆心就預計，嗰場告別聚會就大堆頭喇，起碼會有逾1,000人參加。吓，告別宴咪變咗千人宴？
五會聯搞 勢必墟冚
蔡太話，依家距離明年一月仲有大把時間，但初步計劃，五個經紀團體會一起搞歡送。絲絲就諗，如果屆時有成千人參加，以每圍12人計，都要八十幾圍，都算大陣仗，又唔知會喺邊度搞呢？相信屆時都算係近年最熱鬧嘅告別宴之一。
唔講咁遠住，蔡太話證券商協會今晚已經邀請咗周文耀飯局，慶祝佢早前攞咗科技大學榮譽院士。佢話原本諗住今次飯局只係兩、三圍，點知個飯局電郵一出，報名人數如雪片般飛來，最後有成百人參加，有10圍咁多。蔡太仲笑話，如果多啲人知道今次飯局，起碼有300人參加，由此可反映周文耀喺經紀圈中嘅江湖地位。
余絲韻