經過幾日大挾淡倉後，市場信心回復番唔少，部分股仔亦見蠢動，早前市場所擔心嘅銀根收緊問題，突然間啲憂慮好似一掃而空咁。不過，古晨見內地股市反彈力度麻麻，照睇銀根依然幾緊吓，古晨覺得跟吓勢短炒無妨，小心啲空軍唔知幾時又借「關水喉」來隊低大市。
大市似好實虛，如果想揸鑊鏟入場搵吓錢，應該要搵啲有實質支持嘅股份炒會好啲，好似隻創維數碼（00751），隨着內地日漸城市化，加上數碼電視發展迅速，旗下LCD電視於內地銷售增長理想，第二季較去年同期增長多達2.48倍。市場熱炒內需概念，創維既能交出成績，亦有內銷概念，現價穩中可求勝，近期3元似有阻力，實為大戶收貨格局，一旦突破即可見4元，止蝕放2.5元。
古晨