「創新工場」建立中國名牌

新創投基金將名為「創新工場」（Innovation Works），主要投資者係美國中經合集團（WI Harper Group）嘅劉宇環，基金其他創始投資者亦大有來頭，包括YouTube聯合創辦人陳士駿、郭台銘嘅富士康科技集團、柳傳志嘅聯想控股及新東方教育科技集團嘅俞敏洪等。

李開復尋日喺北京記者會上話，「創新工場」將立足喺資訊產業最熱門嘅領域，包括網絡、移動互聯網和雲端運算，希望每年創建3至5間公司輔助其成長，業務成熟時就會搞上市，希望最終能誕生幾個影響世界嘅中國品牌。

特別到北京捧李開復場嘅郭台銘就話，識咗李開復18年，當佢從蘋果公司、SGI以至微軟及之前嘅Google，每加入一間公司，自己每次都會向對方請教技術與產業發展嘅最新趨勢，佢相信「創新工場」會引領中國未來嘅網絡科技創新。今次係郭台銘繼早前投資於馬雲嘅阿里巴巴（01688）商業網絡平台後，第二度投資網絡事業。

余絲韻