一向妙語連珠嘅中國房地產研究會副會長兼秘書長顧雲昌，前兩日喺內地一個論壇上話，今勻內地樓價上漲嘅最根本、最重要原因就係「特剛」需求持續高燒，因而助長樓價。呢個「特剛需求」，亦即係丈母娘嘅需求。佢話小兩口就快結婚嘞，但一直唔買樓，於是外母將女婿召嚟探討吓，嗰女婿又點會坐得安樂呢，惟有清倉典當，籌錢買樓滿足外母嘅要求，而且呢個唔係個別現象，全國都有。佢話加埋有啲人想住得好啲，又或者做吓投資，所以長遠嚟睇，中國樓價仲會升。

依家買樓諗「避暑」

顧雲昌話去年金融海嘯衝埋嚟，大家當時仲呻點過冬，依家就要考慮點樣「避暑」嘞！佢話有個朋友過年前去上海行一轉，發現嗰度樓價好平，就一口氣掃入10個單位，每個700萬人仔，上月每伙賺300萬人仔。呢啲咪叫虛火囉，係時候要抖暑喇。

余絲韻