本文重點
專門研究股神巴菲特仲寫咗好幾本書嘅Robert P. Miles尋日出席美商會午餐會，同大家分享股神嘅投資心得。巴菲特都唔後生，咁邊個會接佢班呢？Robert就認為，股神接班人個位會一分為三，佢嘅乖仔Howard會接任非執行主席，而比亞迪（01211）非執董David L. Sokol就會接任做CEO，主要負責營運，另外，巴郡亦會喺外面增聘新嘅CEO負責資本運作。
巴菲特鍾情亞洲能源股
股神為人津津樂道嘅資產有好幾筆，好似當年瞓身買嘅可口可樂咁，不過，講最近期而又最廣為人知嘅，就莫過於入股比亞迪嘞。Robert話當初股神入股時，有啲人唔知BYD（比亞迪嘅英文簡寫）係乜，聽到D字尾仲以為係飲品股（Drink），後來先知係電池同汽車。Robert就教路話，雖然佢唔係巴菲特，不過以股神買入中石油（00857）及比亞迪來睇，相信佢係鍾情亞洲能源股。
講咗咁耐，點都要講吓股市致勝心得。Robert提大家，要學巴菲特就千祈咪同股票談戀愛：你對佢有Feel，唔代表佢對你有Feel，啲股票唔會知你擺咗幾多錢入去！
余絲韻