本文重點
九月開始，本地金融界嘅籃球精英又要施展渾身解數，因為第四屆嘅「金融精英盃」又嚟喇，第一輪嘅單循環初賽亦已經喺上周末圓滿結束。身為搞手嘅富昌證券總經理兼「狂牛隊」隊長藺常念話，今年有滙豐銀行及創興銀行（01111）兩支勁旅加入，相信之後嘅賽事一定非常激烈。
滙豐創銀加入戰團
藺Sir回想第一屆只得兩隊參加比賽，今年第四屆就增加至8隊，佢話真係愈諗愈開心。首輪嘅單循環初賽並未有任何隊伍咁快被淘汰，比賽當日，由上屆冠軍恒生銀行（00011）對戰新加入嘅創興隊，結果恒生隊以54比26大熱勝出；另外，藺Sir帶領嘅「狂牛隊」面對中信嘉銀嘅猛攻，最後亦以39分比23分順利獲勝。而當日無落場跑番兩轉嘅藺Sir笑言：「橫掂都贏咁多，唔使我親自落場都得啦。」
由於賽事十分緊湊，差唔多每個星期六都有比賽進行，藺Sir仲同絲絲大爆料，話今個周六會有兩支勢均力敵嘅隊伍對賽，就係滙豐對港交所（00388）。嘩！果然係強手遇上強手，絲絲估計到時球場上又會掀起一場腥風血雨啦。
余絲韻