市場信心就係咁奇怪，上個禮拜仲係悲觀到不得了，呢個話萬八，嗰個又話萬七，點知阿爺一招放寬QFII額度，成個市場氣氛即刻唔同晒，好似第一視頻（00082）咁，四日彈咗67%，追咗夠晒和味，不過股仔係講求鑊氣，如果唔好彩追錯隻21控股（01003）咁，單日插水73%，咁就認真重傷。
近期內地講產能過剩，唔少資源股聞風色變，其實政策係對細細間企業有打擊，不過對大型國企，就絕對係好事，好似隻中煤能源（01898）咁，剛剛母公司同綠地集團簽訂煤炭供需合同，未來五年將會向綠地集團供應6,800萬噸煤炭資源。近期中煤股價由高位回調兩成，不妨於10元邊緣跟炒，隨時破頂可見13元，止蝕位定9.5元。
古晨