樓價係咁升，令樓價低於100萬元嘅細價樓愈來愈少，Vincent睇番土地註冊處八月份嘅住宅樓宇買賣合約數據，發現細價樓嘅註冊量按月跌達16.3%，成個市場只係有893宗，佔整體比率跌到得8%，創○三年有紀錄以來新低，更加係第一次連續4個月錄得單位數，不過，樓價500萬至1,000萬元嘅中價住宅註冊量，就按月升咗22.7%去到1,472宗，佔整體比例更連升5個月至13%，創自去年三月後新高。
發展商主推中價盤
美聯伍創業話，之前價值80萬元嘅物業依家都過咗100萬元，細價樓嘅成交有乜辦法唔跌；而中價樓嘅註冊比率係咁升，係因為發展商近排推盤都係以呢個價位為主，好似將軍澳領都同烏溪沙站銀湖‧天峰咁，聽落又幾有道理。
商場百萬迎黃金周
今年中秋節撞正內地十‧一長假期，預期有唔少內地旅客嚟香港消費，商場就趁勢谷生意。Vincent八到，恒基兆業旗下包括將軍澳新都城中心在內嘅5個商場就豪花100萬元做宣傳推廣。
該集團薛伯榮話，喺十月一至三日期間，內地旅客只要在商場消費滿3,000元，憑港澳通行證同埋3間商戶嘅即日發票，可以免費換取澳洲鮑魚一罐，預期十‧一假期5個商場嘅旅客平均消費可以達到1,500至2,000元，人流比平日上升10%，營業額就會有雙位數字嘅升幅。
（Vincent Lau）