國家外匯管理局在上周五A股收市後，宣布放寬QFII的投資上限及縮短銷定期，由於消息嚟得突然，港股即時有反應，淡友爭相平倉，恒指乘勢收復兩萬點大關，且愈升愈有，最終收市報20,318點，急升556點，主板成交亦增加至756億元。
近期大市處於調整階段，好友頻頻捱打，呢次配合祖國發功，大打反擊戰，亦令23隻熊仔當場被強制收回。
睇番內地目前獲批的QFII機構有七十幾間，以每間投資額度獲增2億美元計，多批的資金其實大約得150億美元，計番人民幣最多只係1,000億元左右，相對內地股市規模，金額真係唔算大。不過由於意義重於一切，阿爺想托住股市之心路人皆見，最起碼在「十‧一」唱生日歌之前，仍然可以繼續歌舞昇平啦！
（小尾）