今晚美國勞動節假期，美股休市，睇番上星期五好友屠殺淡友嗰種狠勁，相信今日淡友繼續無氣抖。期指在周五臨收市前喪挾，轉炒高水，只要外圍無事發生，本周港股唔難再挾高，甚至挑戰二萬一水平。詩詩一向炒股唔炒市，個市死唔去，坐貨都安心多啲，手持國美（00493）屬中長線投資，唔穿止蝕價就坐定定。至於駿威（00203）料可更上一層樓，呢個禮拜希望搵個靚位食胡。
雖然馬鋼（00323）中期業績錄得虧損，但第二財季已恢復盈利，主要係部分業務見改善，期內表現跑贏中期業績錄得負毛利率的同業鞍鋼（00347）。馬鋼的長材鋼產品業務，佔其總產量逾50%，加上市場對鐵路相關鋼鐵產品的需求增加，有助紓緩公司的盈利壓力。詩詩估計在鋼鐵價格回穩，以及在長材鋼和鐵路相關產品的銷量增加下，有助支持馬鋼下半年轉虧為盈，全年業績表現唔會太差。內地推4萬億元人民幣的刺激經濟方案，當中更大灑金錢優化鐵路，相信長材鋼新一輪的價格上升周期將出現，作為大型鋼鐵生產商，馬鋼料可受惠。
詩詩