一個晴朗嘅下午，喺國務院門外，阿爺代表突然召開記者會。

有記者問：「最近股市大跌，係咪代表中央會托市呢？」

阿爺代表答：「呢個係完全、絕對無可能。」

記者：「不過投資者認為為保社會穩定，十月期間中央唔會讓股市大跌，對嗎？」

阿爺代表答：「如果有人咁樣諗，呢個完全係荒謬講法，nonsense。」

記者：「股民、『基民』蝕錢，你唔心痛嗎？」

答：「我全身無邊度有痛，無問題。」

記者：「據說唔少股民損手離場，你有乜嘢建議？」

答：「可以多啲時間享受天倫之樂，同擺多啲時間喺個人興趣上，例如閱讀、聽音樂及旅遊等。」

記者：「咁你認為大牛市幾時返嚟？」

答：「凡事都有定期，天下萬物都有定時。」

搵平衡點創最大利益

我哋成日話內地股市係政策市，因為阿爺鍾意就托，唔鍾意就壓，近排內地股市大冧，就係擔心阿爺出手降溫。其實「宏調」同「空調」嘅原理咪一樣，香港人叫慣做「冷氣」嘅機器，內地人叫佢做「空調」，全名係「空氣調節」，因為呢個機器功能係製冷，但目的應該係調節溫度，即唔係一味要凍，亦要溫度舒適。

近年香港興起話室溫攝氏25.5度最好，對於係「冰人」嘅我，往往處於融化邊緣，但又有好多人話凍喎。人人體質、感受及處境唔同，無可能滿足所有人，做決策者嘅藝術就係搵到個平衡點。呢一點係可以為成個社會創造最大利益，同時令盡量多人滿意，亦唔會踏中部分人條底線，令佢哋起身作反。

內地宏調似乎都會係咁，要掌握呢個節奏，惟有諗諗阿爺心目中嘅理想「溫度」。講真，我都唔敢講乜嘢溫度最好，但係你要明白，呢個溫度關乎13億人嘅生活，唔可以淨係諗住自己個銀包㗎！

（大健）