一場新股混戰一觸即發，兩隻焦點新股國藥（01099）及中冶金分別喺本周四及周五開始招股，連同中國全通（00633）及利郎（01234），本周有4隻新股對撼，而下周亦有匹克及華南城招股。

散戶：有今天無明天

睇番七、八月上市嘅「半新股」，有兩隻已經「破底」（跌穿招股價），分別係承達（02288）及秦發（00866），至於北京金隅（02009）、琥珀能源（00090）、志高（00449）及霸王（01338），上周收市價就分別較招股價高33%、31%、23%同14%。

Baby之前有寫過財經占星學（Financial Astrology）嘅皮毛，利用上市公司成立日（Incorporation Date）嚟開星座命盤，可以睇到公司嘅「命運」，至於首次公開招股日（IPO Date）開嘅命盤，就睇到股價嘅表現，實在太過深奧嘞！化繁為最簡，呢排招股嘅上市公司全部都係處女座，同Baby都幾夾！

滬綜指上周全周微升1點，收報2,861點，呢一點殊不簡單，滬綜指上周一度跌至2,639點，後來反彈最多近9%，至2,875點。港股上周終於肯跌吓，恒指失守並持續低於20,000點，但上周五嚟個拗腰，高見20,413點，收報20,318點。

恒指上周低見19,425點當日，魚缸氣氛仍然唔錯，散戶冇被嚇窒，積極入市。有「股壇資料庫」之稱嘅譚小姐就話︰「唔驚，只要即日鮮就唔使怕，記住『只有今天沒有明天』，唔好留過夜就掂。我之前買咗隻地產股，開市升少少就放出去。」

恐慌指數愈升愈牙煙

另一股友梁兄在旁和應︰「有得食唔食，罪大惡極，依家港股好難炒，開市頭一陣子先跟美股，之後一時跟日本、澳洲，一時又跟A股，太多變數，焗住你即日走貨。」

國際投資者有無咁鎮定呢？有「恐慌指數」之稱嘅VIX指數，反映投資者預期美國標普500指數未來30日嘅波幅，當VIX指數上升，即反映投資者估大市將會非常波動，尤以下跌居多，反之亦然。

VIX指數上周升至29.57，非常貼近30，係最近個半月來少見，單周升咗差唔多20%，上周收報27。

假如VIX指數企穩喺30以上，市場可能即將出現引爆點，大市下插機會頗大。喺○六至○七年中，美股欣欣向榮，VIX指數長期維持喺10至20，投資者好淡定；由○七年中起約9個月，亦即大牛市末期，VIX指數喺20至30之間上落，投資者亢奮；雷曼倒閉，金融海嘯淹至，VIX指數急飆至超過80；去年第四季至今年首季，VIX指數喺40至80之間「發上發落」，投資者情緒跌至谷底。

不過自今年第三季，VIX指數不斷下滑，七月後長期喺30以下，指數重回○七年股市亢奮時，假若指數整固後，進一步下滑至20水平，有利後市，否則仍然有得震無得瞓。

芝加哥期交所（CBOE）有得買賣VIX指數期貨及期權，但原來VIX指數有兩隻交易所上市票據（ETN），可以好似一般美股咁買賣，iPath標普500VIX短期ETN（上市編號：VXX）追蹤一個月期貨，iPath標普500VIX中期ETN（上市編號：VXZ）就睇5個月期貨，兩者喺過去一周分別微跌0.55％及0.16％，近日標指亦有所回升。

金價逼千關啟示危機

金價再次向1,000美元重要關口進逼，作為資金避難所嘅黃金，對上幾次逼近1,000美元大關，適逢貝爾斯登倒閉、油價創新高及市場擔憂銀行國有化，可見金價對危機有一定啟示性。不過自雷曼爆煲後，金價都只喺900美元水平上落。

（Baby）

若然有料想報畀Baby或有嘢問，可電郵money.biz@opg.com.hk