用套息概念買樓投資

返到實際層面，日圓再唔係最低息貨幣，怕出現套息交易拆倉潮唔知係咪諗多咗，但近排個市升唔上去，都係要小心為上。其實套息交易唔係大戶專利，大家都知道，套息交易係話啲大戶借入息口近乎零嘅日圓，然後兌換為其他貨幣投資喺其他金融市場，甚至喺存款息口較高嘅地方做存款，賺息差。

當然股友好難借到咁低息口，亦唔係咁易投資喺全球各地，但要發揮套息交易呢個概念仲有好多途徑。就用買樓收租做例子，唔少人買樓特別係物業投資者，好睇重個「腰」（英文Yield嘅讀音），即係租金回報率，你諗吓，如果可以年息3厘做按揭，然後租出去收等同物業買入價年息6厘嘅租金，係咪套到3厘息？仲賺埋有層樓揸手添。

唔係話你一定要買樓收租，但大家可以明白，與其鬧大戶，不如向佢哋偷師。呢個就係我上次講，試吓搵出自己優勢，賺錢機會可能就喺身邊。上周五我喺Yahoo熱門搜尋度見到「閱讀報告」榜上有名，我即刻諗到，閱讀報告係常見嘅暑假功課，梗係班學生臨急先喺網上想搵資料「參考」喇！不如開個網站集中愛閱讀嘅人，然後按學生書目配對，提供資料參考，從中收佣。講真呢條橋未必Work，不過至少有動吓腦呀！如果你有更好構思，不妨電郵嚟分享吓。

有得必有失權衡利弊

轉一轉話題，話說英女王去年底出席倫敦經濟學院（LSE）活動時，問在場眾多頂級經濟學者：「點解無人預測到今次金融危機？」當時學者們「啞咗」，後來佢哋喺幾個月前回信畀英女王，話就算係聰明人都唔能夠掌握整個金融體系嘅風險，呢件事引起唔少門派之爭。

我都係讀經濟學出身，但只想講讀經濟學令我培養到一個處世之道，就係謹記「有得必有失」。經濟學基礎係話資源有限，所以你要做選擇，選擇準則就係權衡利弊。人好多唔開心，就係走唔出希望兩全其美嘅心情，但明白「有得必有失」，面對抉擇時可試吓問自己邊一樣更重要，說服自己放低一啲執着。

（大健）