恒指「倒影」預示升勢？

小尾即刻用佢部新iPhone上網，喺恒指圖（○七年二月至今）畫咗一條線，「你哋睇！去年九月十日恒指正式跌穿20,000點，比較九月十五日雷曼『爆煲』之前和之後，好似倒影咁！我哋可能即將迎接另一個倒影（升浪）！」Baby一直好認同「It's the best of times, it's the worst of times」（這是最好時候，這是最壞的時候），變幻才是永恒。

美國總統奧巴馬提名伯南克連任聯儲局主席，伯老收拾美國次按爛攤子稍見成績，唔通換人咩？根據《東方產經》網上民調顯示，66%網民認為伯老係合適人選，34%就認為佢應該落台。

38%藍籌減派中期息

本地上市公司最近派發嘅中期業績，完全反映金融海嘯嘅影響，但由於去年上半年基數仍算理想，加上會計準則有時各有詮釋，股東收息少咗幾多，比盈利升跌嚟得更實際。34家已公布中期業績嘅藍籌中，撇除5家例牌唔派中期息嘅公司，有24%（7家）增加派息，38%（11家）維持股息不變，38%（11家）減少派息，連同呢半年嚟股價升幅，總回報都幾和味！

上周恒指波幅僅600點

11家維持股息金額不變嘅藍籌公司中，大部分（8家）盈利均為倒退，中海油（00883）及恒隆地產（00101）盈利更分別跌達55%及69%，中電（00002）、港燈（00006）及煤氣（00003）發揮公用股穩定派息嘅政策，「買嚟收息」嘅恒生亦貫徹其作風。

大健咁啱路過，仲一拖二：「佢哋係莉莉和高妹，平日都出入開各區魚缸。」莉莉話真係「見鬼」（啋！後日係農曆七月十四），上周恒指微跌0.5%，全周上下波幅600幾點，悶到死。滬綜指弱勢持續。

散戶「3M先生」話以歷史嚟講，每年八月至十月多數係牛皮市，港股成交縮，加上牛市二期可以長時間橫行，現時恒指收窄上落，買貨量減少。大福證券旺角分行經理陳日嵐就話，恒指上升空間有限，很多散戶對後市感疑惑，入市信心不足，但因內銀及內房股一直係散戶至愛，相信佢哋仍繼續短炒呢兩個板塊。

（Baby）

若然有料想報畀Baby或有嘢問，可電郵money.biz@opg.com.hk