上個禮拜港股表現都幾曳，內地關水喉消息不絕，唔少鑊鏟友都暫避風頭，雖然以恒指計，上周跌幅唔係好大，但股仔就插水式下跌。無他嘅，現時中港一家親，早前北水來港炒股亦唔係咩秘密，一話要返內地交數，沽貨套現便成為唯一辦法。不過，呢轉咁沽法就似乎急進咗，一沽就散真係嚇怕唔少鑊鏟友，睇怕無番一頭半個月，都幾難回復番市場嘅信心。
咁嘅時勢宜守不宜攻，基金股就不妨跟吓，好似中國鐵建（01186）咁，剛公布業績，雖然同市場預期差唔多，不過摩通即時出報告睇好，仲調高目標價到14.2元。中央未來繼續大灑金錢起鐵路，中鐵建有前景又有業績支持，基金近期無嘢買下，佢一定係首選，一於博佢升到摩通目標價14.2元，止蝕放10.5元。
古晨