花旗魚缸係金融海嘯的源頭，通常弱勢市場留到最後發威，花旗魚缸近周轉強，跑贏亞太區魚缸，本月累升百分之四，將表現轉弱的祖國魚缸完全比下去，對於缸邊友嚟講，呢個亦係不祥之兆，預示全球股市升浪已行至盡頭，連續五個月的全球魚缸鑊鏟派對已到尾聲。

九月魚缸仍偏淡

祖國魚缸可以話係呢次全球魚缸升浪的火車頭，但本月初開始走晒樣，除咗連續四周下滑外，呢個月已累跌一成六。上證指數由3,400點高位，回落至2,860點，亦係全球魚缸步入調整期的徵兆之一。古勝相信其他魚缸會隨A股見頂回落，本地魚缸亦難獨善其身，恒指累計本月已跌近6%，在下預期九月都係凶多吉少，加上基金又季結，各地魚缸勁升五個月，芬佬收割亦好正常。

花旗次季問題銀行數目再增百間至416間，創15年新高，而且華爾街銀行死性不改，危機稍過又大灑金錢，似乎未有真正吸取海嘯的慘痛教訓，又再從事高槓桿投資有關的融資業務。現時18間債券交易商持有抵押債券擔保品總值達到276億美元，較五月份大增75%，呢個增幅亦是○七年四月以來最高，剛好係「熊仔燈」兩個對沖基金爆煲前3個月，接住故事發展係點，相信看官記憶猶新。古勝並非危言聳聽，但作為鑊鏟友，要經常提高警覺，識得居安思危好重要。

資產質素有改善

既然本地魚缸隨時爆落，呢個時候唔使急於掃貨，應候低吸納實力股。剛派完成績表的中國銀行（03988）係古勝心水之一。中行跟阿仔中銀香港（02388）上周齊齊派成績表。中行上半年盈利411.23億元人仔，好過市場預期。中銀上半年核心業務則遜於預期，純利倒退5.6%，而且減少派息。

睇番中行份成績表，淨利息收入跌幅收窄，斷估專家則預期，下半年的淨息差可望回升。不過，中行淨息差一向係紅色錢莊中較低者，皆因要「硬食」外幣業務，外幣業務淨息差僅1.6%，較○八年底的2.89%，大幅下跌1.29%。期內，中行資產質素改善，不良貸款總額及不良貸款率保持「雙降」。貸款減值損失為70.27億元，信貸成本0.37%。不過，中行的非利息收入只有331.31億元，按年下跌11.27%，其他已派成績表的紅色錢莊非利息收入均上升，相對中行的非利息收入認真麻麻。幸而中行受惠祖國業務復甦，前景遠較仔仔中銀佳，二選一等機會收集，梗係要阿媽，中行見3.5元入得過。

古勝