本文重點
剛啱改名嘅證券業協會尋日選新主席，大福證券集團（00665）執行董事李耀榮以大熱姿勢當選，至於副主席就分別係嘉信金融服務總經理馮煒能、東英金融集團嘅陳立德及招商證券董事副總經理繆英源，中銀國際證券嘅黃仲文就擔任義務秘書。
剛卸任證券業協會主席嘅李耀新話，李耀榮尋日係眾望所歸，董事會有25票，除咗4名無出席外，21票全部都選李耀榮。至於3名副主席亦各有所長，好似馮煒能嘅專長係期貨，陳立德嘅專長係企業財務，繆英源嘅專長就係證券，證明該會係廣納人才。
就職典禮併會慶大搞
新一屆董事會會喺下月二日生效，就職典禮就安排喺十一月二十四日舉行，由於今年剛啱係該會30周年，會與今年就職禮一併大搞，屆時除咗邀請本地金融界代表人物出席外，仲會邀請海外同業如台灣證券協會過嚟參與，台灣證券協會剛剛至同佢哋簽咗備忘錄。
依家做證券業協會主席並唔易，李耀榮上任後，估計會有多個外訪要佢參與，好似政府十月拉隊去中東，亞洲證券論壇今年亦會喺澳洲舉行，睇怕李耀榮都有排忙！
余絲韻