本文重點
喺香港電訊界中，中移（00941）旗下嘅中移香港（即前身萬眾電話）可謂其中一個傳奇，皆因其「開山祖師」之一，係老外行政總裁周漢森（Charles Henshaw），經歷公司幾次股權變動仍穩坐CEO之位，不過天下無不散之筵席，Charles將於九月正式榮休，返回英國老家退休享清福。
港電訊業教父輩人物
自歸入中移後，中移香港嘅營運比之前低調得多，所以年輕一輩未必對Charles有太大印象，但事實上，佢確係本港電訊業嘅教父輩人物之一，因為佢除咗喺11年前以技術總監（CTO）身份加入當時嘅萬眾，主導萬眾嘅GSM1800 2G網建設，及後並成為CEO外，早喺七十年代佢已經喺香港及亞洲地區工作，係電訊業行內公認嘅前輩之一，而隨着今次退休，佢喺亞洲及本港近30年嘅工作生涯亦暫告一段落。
周漢森退休後，佢嘅位置將由集團主席林振輝兼任，由於林振輝來港出任中移香港主席已有一段時間，所以今次嘅人事變動，對中移香港未來發展相信唔會有太大影響。
余絲韻