本文重點
千呼萬喚始出來嘅滙豐人壽保險終於成立，為咗隆重其事，滙豐仲向來賓送贈純金製嘅迷你燈籠，以及台灣女歌手王若琳主唱嘅CD《Times of your life》做宣傳，鄭海泉同王冬勝都特登去上海，與湯德信及老建榮齊齊舉行記者會，雖然話同行如敵國，據知滙豐嘅老拍檔平保都有派代表出席酒會，實行用行動支持。
內地諺語高層投晒降
滙豐一向以環球的本土銀行自居，管理層做足工夫，雖然佢哋應該講英文好過普通話，但記者會就用普通話進行，湯德信呢位老外要靠專人貼身傳譯。絲絲較少聽佢哋講普通話，估唔到王冬勝嘅普通話蠻不錯，不枉佢喺內地打滾咗咁耐。期間有段小插曲，有位內地記者講啲諺語，幾位管理層都投晒降，呢位記者嘗試解釋，但鄭海泉就好直接話聽唔明，絲絲反而最想知，湯德信嗰位即時傳譯點處理呢？
講到滬港競爭，鄭海泉坦言資本市場或有影響，但以中國嘅吸引力，絕對可以令跨國企業揀選在一地，甚至兩地同時上市。
余絲韻