港股在期指結算前夕靠穩，盤中曾受內地股市帶動，恒指升逾百點，收市報20,456點，微升21點，不過成交額只有555億元，主要係股仔無得炒。詩詩意興闌珊，一開市以每股5.4元沽出京信通信（02342），真係唔想持貨。至於國美（00493）早決定作中長線投資，繼續持有。個市靜英英，唔想買貨，股仔唔當炒，都係睇番實力股穩陣。
金山軟件（03888）最廣為人知當然係其網絡安全產品，隨着網絡遊戲愈能吸引年輕網民，集團近年積極拓展網絡遊戲市場，令盈利高速增長，今年股價已從低位翻咗兩番。
金山在第三季推出《劍俠III》，預期未來兩年市佔率持續提升，成盈利增長催化劑，每股盈利可維持高增長。較早前，花旗曾發表最新報告，指金山軟件○九及一○年每股盈利可分別增長44.6%及60.08%，至0.466元及0.75元，現價計今年預測市盈率約16倍，以一○年計預測市盈率也不過是10倍，係有業績支持的實力股。詩詩吼8元邊上車，惟難博短炒，若以明年20倍預測市盈率計算，睇長些少，今年底有機會見15元。
詩詩